Oudtshoorn, 19 Januarie 2008: In Desember 2007 het die Oratorium besoek gekry van ‘n vriendin uit België, Josiane Ulrikx en wat ‘n besonderse Kersgeskenk het sy nie saamgebring nie. Wel wetende dat beelde van St. Filip Neri haas onbekombaar is, het sy ‘n bekende Belgiese beeldhouer, Noels Ludo, opdrag gegee om ‘n beeld van die heilige Filip Neri te maak. Die beeldhouer is van advies bedien deur Vr. Hans Tercic, skrywer van ‘n uitstekende boek oor St. Filip Neri en kenner van die lewe van die Stigter van die Oratorium. Die merkwaardige lewensgetroue beeld staan 1.2 meter hoog en is uit poliëster gegiet. Dit is inderdaad ‘n kunswerk van die hoogste gehalte en dit beklee nou ‘n ereplek in die Oratoriumkapel.